నెల్లూరు, మార్చి 30 (జనస్వరం) : నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి రాయవేలూరు సిఎంసీ ఆసుపత్రి నుంచి డిశ్చార్జ్ అయ్యారు. గత వారం రోజులుగా ఆయన న్యూరో సమస్యలతో ఇబ్బందులు పడుతున్న విషయం తెలిసిందే. వైద్యుల పర్యవేక్షణలో ఆయనకు చికిత్స అందించగా ఆరోగ్యం మెరుగుపడడంతో డిశ్చార్జ్ చేశారు. ఈ సందర్భంగా ఆయన ఆరోగ్య పరిస్థితి నిలకడగా ఉందని వైద్యులు తెలిపారు. ఆసుపత్రి నుంచి బయటకు వచ్చిన అనంతరం కాణిపాకం వినాయకుడిని దర్శించేందుకు ఆయన బయలుదేరి వెళ్లారు. దర్శనం అనంతరం నెల్లూరుకు చేరుకుని ప్రజలను కలుసుకుంటారని సమాచారం. కాగా, ఆయన త్వరగా కోలుకోవాలని అనుచరులు, కార్యకర్తలు కోరుకున్నారు. ఎమ్మెల్యే ఆరోగ్యంపై పలువురు నాయకులు, అభిమానులు విచారం వ్యక్తం చేస్తూ త్వరగా పూర్తిగా కోలుకోవాలని ఆకాంక్షించారు. ప్రస్తుతం ఆయన ఆరోగ్యం సంతృప్తికరంగా ఉందని సమీప వర్గాలు వెల్లడించాయి.
