– ఏపీ టిడ్కో చైర్మన్ వేములపాటి అజయ్ కుమార్‌ను కలిసిన మార్కెట్ యార్డ్ చైర్మన్ పూల శివప్రసాద్
– పెండింగ్ పనులను పూర్తి చేసి లబ్ధిదారులకు ఇళ్లు అందించాలని విజ్ఞప్తి
అనంతపురం, అక్టోబర్ 10 (జనస్వరం): అనంతపురం జిల్లా పర్యటనకు విచ్చేసిన ఆంధ్రప్రదేశ్ టిడ్కో చైర్మన్ వేములపాటి అజయ్ కుమార్‌ను పుట్టపర్తి మార్కెట్ యార్డ్ చైర్మన్ పూల శివప్రసాద్ మర్యాదపూర్వకంగా కలిశారు. ఈ సందర్భంగా పుట్టపర్తి మున్సిపాలిటీ పరిధిలో 2017లో ప్రారంభమై, గత ప్రభుత్వ హయాంలో నిలిచిపోయిన టిడ్కో ఇళ్ల నిర్మాణ పనులను పునఃప్రారంభించేందుకు నిధులు విడుదల చేసినందుకు ప్రత్యేక ధన్యవాదాలు తెలిపారు. నిరుపేద, మధ్యతరగతి కుటుంబాల సొంతింటి కలను సాకారం చేయడంలో టిడ్కో గృహ నిర్మాణ పథకం ఎంతో కీలకమని పేర్కొన్నారు. ఏళ్ల తరబడి ఇళ్ల కోసం ఎదురుచూస్తున్న లబ్ధిదారుల ఇబ్బందులను దృష్టిలో ఉంచుకుని నిర్మాణ పనులను వేగవంతం చేయాలని కోరారు. పుట్టపర్తి ప్రాంతంలో నిర్మాణంలో ఉన్న టిడ్కో గృహ సముదాయాలను చైర్మన్ వేములపాటి అజయ్ కుమార్ స్వయంగా సందర్శించి, క్షేత్రస్థాయిలో పనుల పురోగతిని పరిశీలించాలని విజ్ఞప్తి చేశారు. పెండింగ్‌లో ఉన్న నిర్మాణ పనులను త్వరితగతిన పూర్తి చేసేందుకు అవసరమైన చర్యలు తీసుకోవడంతో పాటు సంబంధిత అధికారులతో సమీక్ష నిర్వహించాలని కోరారు. టిడ్కో ఇళ్ల నిర్మాణం పూర్తయితే ఎంతోమంది పేద, మధ్యతరగతి కుటుంబాలకు సొంతింటి కల నెరవేరుతుందని తెలిపారు. ఇప్పటికే సంవత్సరాలుగా ఎదురుచూస్తున్న లబ్ధిదారులకు మరింత ఆలస్యం జరగకుండా అధికారులు సమన్వయంతో పనిచేయాలని సూచించారు. ప్రభుత్వం విడుదల చేసిన నిధులను సద్వినియోగం చేసుకుని నిర్మాణ పనుల్లో వేగం పెంచాలని, అర్హులైన లబ్ధిదారులకు వీలైనంత త్వరగా ఇళ్లను అందుబాటులోకి తీసుకురావాలని పూల శివప్రసాద్ ఆకాంక్షించారు.
