– రాజస్థాన్ పై 27 పరుగుల తేడాతో అద్భుత విజయం
కోల్ కతా, నవంబర్ 6 (జనస్వరం ప్రత్యేక ప్రతినిధి) : స్థానిక ఆదిత్య అకాడమీ క్రికెట్ గ్రౌండ్లో జరిగిన యూ – 19 మ్యాచ్లో ఆంధ్ర జట్టు అద్భుత ప్రదర్శనతో రాజస్థాన్ పై 27 పరుగుల తేడాతో విజయం సాధించింది. ఈ విజయంతో ఆంధ్రా జట్టు టోర్నమెంట్ క్వార్టర్ ఫైనల్ కు అర్హత సాధించింది. టాస్ గెలిచి బ్యాటింగ్ ఎంచుకున్న ఆంధ్రా జట్టు 20 ఓవర్లలో 5 వికెట్ల నష్టానికి 126 పరుగులు చేసింది. అంజుమ్ (38), సేతు సాయి వి (26) కీలక ఇన్నింగ్స్ ఆడారు. అనంతరం లక్ష్య ఛేదనకు దిగిన రాజస్థాన్ జట్టు ఆంధ్రా బౌలర్ల ధాటికి తట్టుకోలేక 20 ఓవర్లలో 8 వికెట్లు కోల్పోయి 99 పరుగులకే పరిమితమైంది. కెప్టెన్ జషా మెహక్ అద్భుత ఆల్రౌండర్ ప్రదర్శన కనబరిచింది. బ్యాటింగ్ లో నాటౌట్ గా నిలిచి, బౌలింగ్లో 4 ఓవర్లలో కేవలం 23 పరుగులు ఇచ్చి 3 వికెట్లు తీశారు. ఆమెకు ‘ఉమెన్ ఆఫ్ ది మ్యాచ్’ అవార్డు లభించింది. జట్టు మేనేజర్ మౌనిక జషా ప్రదర్శన ను, అలాగే మొత్తం జట్టు కృషిని అభినందిస్తూ, రాబోయే మ్యాచ్ లోనూ ఇలాగే ప్రతిభ కనబరచాలని సూచించారు.
