– మాదకద్రవ్యాల వినియోగంతో జీవితాలు నాశనం.. యువత అప్రమత్తంగా ఉండాలి
– శ్రీకృష్ణదేవరాయ విశ్వవిద్యాలయంలో విద్యార్థులకు అవగాహన కార్యక్రమం
– మత్తు పదార్థాలకు ఆకర్షితులు కావద్దు.. లక్ష్యసాధన దిశగా అడుగులు వేయండి: ప్రొహిబిషన్ అసిస్టెంట్ కమిషనర్ ప్రసాద్
అనంతపురం, అక్టోబర్ 15 (జనస్వరం): జర్నలిస్ట్ అసోసియేషన్ ఆఫ్ ఆంధ్రప్రదేశ్ (జేఏఏపీ) ఆధ్వర్యంలో శ్రీకృష్ణదేవరాయ విశ్వవిద్యాలయంలో విద్యార్థులకు మాదకద్రవ్యాలు, మత్తు పదార్థాల దుష్ప్రభావాలపై అవగాహన కార్యక్రమాన్ని నిర్వహించారు. ఈ కార్యక్రమానికి జేఏఏపీ అనంతపురం జిల్లా అధ్యక్షుడు నాగేంద్ర యాదవ్ అధ్యక్షత వహించారు. ముఖ్య అతిథులుగా శ్రీకృష్ణదేవరాయ విశ్వవిద్యాలయం వైస్‌ ఛాన్సలర్‌ ఎన్‌.వి.ఆర్‌. జ్యోతికుమార్‌, ప్రొహిబిషన్ అసిస్టెంట్ కమిషనర్ ప్రసాద్, అనంతపురం జిల్లా ప్రొహిబిషన్ అధికారి రామ్మోహన్ రెడ్డి, బీజేపీ రాష్ట్ర కార్యదర్శి సంధిరెడ్డి శ్రీనివాస్, కళాశాల ప్రిన్సిపల్ రామచంద్ర, శ్రీకృష్ణదేవరాయ విశ్వవిద్యాలయ నాయకుడు జైపాల్ యాదవ్ తదితరులు పాల్గొన్నారు. ఈ సందర్భంగా ప్రొహిబిషన్ అసిస్టెంట్ కమిషనర్ ప్రసాద్ మాట్లాడుతూ విద్యార్థి దశ జీవితంలో ఎంతో కీలకమని, ఈ సమయంలో తీసుకునే నిర్ణయాలు భవిష్యత్తుపై ప్రభావం చూపుతాయని తెలిపారు. మాదకద్రవ్యాల వినియోగం మొదట సరదాగా ప్రారంభమైనప్పటికీ, క్రమంగా వ్యసనంగా మారి జీవితాలను నాశనం చేసే ప్రమాదం ఉందని హెచ్చరించారు. మత్తు పదార్థాలకు అలవాటు పడటం వల్ల చదువుపై ఏకాగ్రత తగ్గడంతోపాటు శారీరక, మానసిక ఆరోగ్య సమస్యలు తలెత్తే అవకాశం ఉందని వివరించారు. స్నేహితుల ఒత్తిడికి లోనై మత్తు పదార్థాల జోలికి వెళ్లవద్దని, చెడు అలవాట్లకు దూరంగా ఉంటూ మంచి లక్ష్యాలను నిర్దేశించుకోవాలని విద్యార్థులకు సూచించారు. మాదకద్రవ్యాల అక్రమ రవాణా, విక్రయాలు, వినియోగం వల్ల కలిగే అనర్థాలపై అవగాహన కలిగి ఉండాలని పేర్కొన్నారు. విద్యార్థులు తమ చుట్టూ ఎవరైనా మత్తు పదార్థాల బారిన పడుతున్నట్లు గుర్తిస్తే, వారికి తగిన అవగాహన కల్పించడంతోపాటు అవసరమైన సహాయం అందేలా చూడాలని సూచించారు. యువత ఆరోగ్యంగా, క్రమశిక్షణతో జీవిస్తూ విద్య, క్రీడలు, నైపుణ్యాభివృద్ధిపై దృష్టి సారించాలని పిలుపునిచ్చారు. మాదకద్రవ్యాల రహిత సమాజ నిర్మాణంలో విద్యార్థులు కీలక పాత్ర పోషించాలని తెలిపారు. విద్యార్థులకు పాఠ్యాంశాలతోపాటు సామాజిక బాధ్యత, ఆరోగ్య పరిరక్షణ, మత్తు పదార్థాల దుష్ప్రభావాలపై అవగాహన కల్పించడం ఎంతో అవసరమని కార్యక్రమంలో పాల్గొన్న ప్రముఖులు అభిప్రాయపడ్డారు. మాదకద్రవ్యాల రహిత సమాజ నిర్మాణానికి విద్యార్థులు, ఉపాధ్యాయులు, తల్లిదండ్రులు సమష్టిగా కృషి చేయాలని సూచించారు. యువత చెడు అలవాట్లకు దూరంగా ఉంటేనే వ్యక్తిగత అభివృద్ధితోపాటు దేశాభివృద్ధికి దోహదపడగలరని పేర్కొన్నారు. విద్యాసంస్థల్లో ఇలాంటి అవగాహన కార్యక్రమాలు నిర్వహించడం ద్వారా విద్యార్థుల్లో చైతన్యం పెంపొందించవచ్చని తెలిపారు. మత్తు పదార్థాలకు దూరంగా ఉంటూ ఆరోగ్యకరమైన జీవనశైలిని అలవర్చుకోవాలని విద్యార్థులకు సూచించారు. ఈ కార్యక్రమంలో జేఏఏపీ అనంతపురం జిల్లా అధ్యక్షుడు నాగేంద్ర యాదవ్, జిల్లా కోశాధికారి రాజన్న, శ్రీ సత్యసాయి జిల్లా ఉపాధ్యక్షుడు దొడ్డప్ప, బీజేపీ పొలిటికల్ ప్రోగ్రామ్ అండ్ పబ్లిక్ మీటింగ్ జిల్లా కన్వీనర్ మేఘనాథ్, సింగనమల మార్కెట్ డైరెక్టర్, బీజేపీ నాయకుడు మిట్ట రాజన్న తదితరులు పాల్గొన్నారు.
