- కక్షసాధింపు రాజకీయాలకు పాల్పడుతున్న ప్రభుత్వం

- వైఎస్సార్సీపీ రాష్ట్ర కార్యదర్శి గుల్లా ఏడుకొండలు

గోకవరం, జూలై 23 (జనస్వరం): మాజీ మంత్రి, వైఎస్సార్సీపీ నేత సిదిరి అప్పలరాజు అరెస్టు అప్రజాస్వామిక చర్య అని వైఎస్సార్సీపీ రాష్ట్ర కార్యదర్శి గుల్లా ఏడుకొండలు తీవ్రంగా విమర్శించారు. రోడ్డు ప్రమాద ఘటనను రాజకీయ కోణంలో చూపిస్తూ మాజీ మంత్రి అప్పలరాజును అరెస్టు చేయడం దుర్మార్గమని ఆయన ఆరోపించారు. ఈ సందర్భంగా ఆయన మీడియాతో మాట్లాడుతూ, రాష్ట్రంలో ప్రజా సమస్యల పరిష్కారంలో విఫలమైన కూటమి ప్రభుత్వం ప్రజల దృష్టిని మళ్లించేందుకు డైవర్షన్ రాజకీయాలకు పాల్పడుతోందని విమర్శించారు. వైఎస్సార్సీపీ నాయకులు, కార్యకర్తలనే లక్ష్యంగా చేసుకుని కక్షసాధింపు చర్యలు కొనసాగిస్తున్నారని ఆరోపించారు. రాష్ట్రంలో చట్టబద్ధ పాలనకు బదులుగా "రెడ్ బుక్ రాజ్యాంగం" అమలవుతోందని ఆయన వ్యాఖ్యానించారు. సంబంధిత ఘటనపై చట్టపరమైన విచారణ జరపాల్సిన సమయంలో తండ్రి, కొడుకులను అరెస్టు చేసి వేధించడం అన్యాయమని పేర్కొన్నారు. సామాన్య బీసీ మధ్యతరగతి కుటుంబంలో జన్మించిన సిదిరి అప్పలరాజు వైద్య విద్య పూర్తి చేసి ప్రజలకు సేవలందించిన వైద్యుడని, అలాంటి వ్యక్తిపై రాజకీయ కక్షతో చర్యలు తీసుకోవడం బాధాకరమని ఏడుకొండలు అన్నారు.

రాష్ట్రంలో బీసీలు, దళితులపై జరుగుతున్న ఘటనల పట్ల యువత, ప్రజల్లో ఆందోళన నెలకొందని ఆయన పేర్కొన్నారు. ప్రభుత్వం అనుసరిస్తున్న చర్యలను చట్టపరంగాను, రాజకీయంగాను ఎదుర్కొంటామని స్పష్టం చేశారు. అప్పలరాజు అరెస్టు నేపథ్యంలో అధికార, ప్రతిపక్షాల మధ్య రాజకీయ విమర్శలు మరింత వేడెక్కే అవకాశం కనిపిస్తోందన్నారు. ఈ వ్యవహారంలో ప్రభుత్వం తీసుకునే తదుపరి చర్యలు, విచారణ పురోగతిపై రాజకీయ వర్గాల్లో ఆసక్తి నెలకొంది.