నెల్లూరు, జనవరి 18, (జనస్వరం) : నెల్లూరు నగరానికి శిరోమణిగా నిలిచే సంప్రదాయ పండుగలలో ఏటి పండుగ ఒకటిగా నిలుస్తోంది. సంక్రాంతి పండుగ చివరి రోజున పెన్నా నది తీరంలో వేలాదిమంది ప్రజల భాగస్వామ్యంతో భక్తిశ్రద్ధలతో ఈ పండుగను ఘనంగా నిర్వహించారు. పూర్వీకులు ఆచరించిన ఆచారాలు, విధానాలను కొనసాగిస్తూ కుటుంబ సభ్యులు, గ్రామ ప్రజలు సమష్టిగా పాల్గొని ఆనందోత్సాహాలతో ఈ వేడుకను జరుపుకున్నారు. పెన్నా నది తీరంలో సాగిన ప్రత్యేక పూజలు, సంప్రదాయ కార్యక్రమాలు నెల్లూరు ప్రజల జీవన విధానం, సంస్కృతి, సంప్రదాయాలకు ప్రతీకగా నిలిచాయి. ఈ సందర్భంగా ప్రజల మధ్య పరస్పర గౌరవం, ఆత్మీయత, సామాజిక ఐక్యత స్పష్టంగా కనబడింది. కుల, మత, రాజకీయ భేదాలు లేకుండా ప్రజలంతా ఒకే వేదికపై కలిసి పండుగను జరుపుకోవడం విశేషంగా ఆకట్టుకుంది. ప్రజల జీవన విధానం, సంస్కృతి, సంప్రదాయాల పరిరక్షణపై ప్రత్యేక శ్రద్ధ అవసరమని జనసేన పార్టీ నేతలు ఈ సందర్భంగా పేర్కొన్నారు. మన వేర్లు బలంగా ఉంటేనే సమాజం ముందుకు సాగుతుందనే భావనతో స్థానిక సంప్రదాయ పండుగలను గౌరవించడం, ప్రజలతో కలిసి జరుపుకోవడం జనసేన పార్టీ మౌలిక సిద్ధాంతమని జిల్లా ప్రధాన కార్యదర్శి కిషోర్ గునుకుల తెలిపారు. ఇలాంటి పండుగలు భవిష్యత్ తరాలకు మన సంస్కృతిని పరిచయం చేసే వారసత్వంగా నిలుస్తాయని, ప్రజల మధ్య ఐక్యతను మరింత బలోపేతం చేస్తాయని అన్నారు. ఈ సందర్భంగా నెల్లూరు ప్రజలందరికీ ఏటి పండుగ శుభాకాంక్షలు తెలియజేస్తూ, ప్రజల సంప్రదాయాలు, హక్కులు, జీవన విలువలను కాపాడేందుకు జనసేన పార్టీ ఎల్లప్పుడూ కట్టుబడి ఉంటుందని ఆయన స్పష్టం చేశారు.