బళ్లారి, మార్చి 7, జనస్వరం : నగరానికి అవసరమైనంత నీరు నిల్వ చెరువుల్లో ఉన్నందున ఈ వేసవిలో బళ్లారి నగరానికి తాగునీటి సరఫరాలో ఎలాంటి అంతరాయం ఉండదని ఎమ్మెల్యే నారా భరత్ రెడ్డి తెలిపారు. శనివారం సాయంత్రం నగర పరిధిలోని అల్లిపుర చెరువును సందర్శించి పరిశీలించిన అనంతరం ఆయన మీడియాతో మాట్లాడారు. కాలువ మరమ్మతులు, క్రస్ట్ గేట్ల ఏర్పాటు పనులు కొనసాగుతున్నాయని చెప్పారు. తాగునీటి కోసం అవసరమైనంత నీటి నిల్వ ఇప్పటికే ఉందని, తమకు కేటాయించిన 1.3 టీఎంసీ నీటిని వచ్చే నెలలోపు పొందేలా చర్యలు తీసుకుంటున్నామని తెలిపారు. అల్లిపుర చెరువు బండ్ మరియు పరిసర ప్రాంతాల అభివృద్ధికి నగరాభివృద్ధి ప్రాధికార సంస్థ నిధులతో పనులు చేపడతామని చెప్పారు. అలాగే రూ.1200 కోట్లతో నిరంతర తాగునీటి సరఫరా కోసం ప్రత్యేక ప్రాజెక్టును అమలు చేస్తూ, కొళగల్ సమీపంలో భారీ చెరువు నిర్మాణానికి ప్రణాళికలు రూపొందిస్తున్నామని వెల్లడించారు. అంతర్గత కాలువల నిర్మాణానికి రూ.380 కోట్లు బళ్లారి మహానగర పాలక సంస్థ పరిధిలో అంతర్గత కాలువల నిర్మాణానికి రూ.380 కోట్లు మంజూరు చేయాలని ముఖ్యమంత్రిని కోరినట్లు చెప్పారు. ఈ విషయం బడ్జెట్‌లో ప్రకటించకపోయినా, అదనపు ప్రణాళికలో చేర్చేందుకు అనుమతి లభించిందన్నారు. అక్రమ యూరియా విక్రయాలపై మీడియా అడిగిన ప్రశ్నకు సమాధానంగా ఎమ్మెల్యే నారా భరత్ రెడ్డి మాట్లాడుతూ, అక్రమ యూరియా మాత్రమే కాకుండా అక్రమంగా జొన్న నిల్వలు, విక్రయాలపై కూడా సమగ్ర దర్యాప్తు చేపడతామని తెలిపారు. ఈ కార్యక్రమంలో మేయర్ పి. గాదెప్ప, మాజీ మేయర్ ఎం. రాజేశ్వరి, కార్పొరేటర్లు కుబేర, పెరం వివేక్, పాలక సంస్థ కమిషనర్ మంజునాథ్, కాంగ్రెస్ నాయకులు ఎం. సుబ్బరాయుడు, పరశురాముడు, హొన్నూరప్ప శేఖర్ తదితరులు పాల్గొన్నారు.