నెల్లిమర్ల, జనవరి 02, (జనస్వరం) : నియోజకవర్గ యువతలో దాగి ఉన్న ప్రతిభను వెలికితీసేందుకు క్రీడా పోటీలు కీలక పాత్ర పోషిస్తాయని నెల్లిమర్ల ఎమ్మెల్యే లోకం నాగ మాధవి అన్నారు. పూసపాటిరేగ మండలంలోని SMS ఫార్మా కంపెనీ ఎదురుగా ఉన్న మైదానంలో నిర్వహించిన NPL (Nellimarla Premier League) క్రికెట్ టోర్నమెంట్‌ను ఆమె ఘనంగా ప్రారంభించారు.
ఈ సందర్భంగా ఎమ్మెల్యే మాట్లాడుతూ, క్రీడలు కేవలం వినోదానికి మాత్రమే పరిమితం కావని, అవి యువతలో క్రమశిక్షణ, పట్టుదల, నాయకత్వ లక్షణాలను పెంపొందిస్తాయని తెలిపారు. క్రీడల ద్వారా మానసిక దృఢత్వం పెరుగుతుందని, విజయం–ఓటములను సమానంగా స్వీకరించే దృక్పథం అలవడుతుందని ఆమె పేర్కొన్నారు. నెల్లిమర్ల నియోజకవర్గ యువతను విద్య, ఉపాధి, క్రీడలు వంటి అన్ని రంగాల్లో ప్రోత్సహించేందుకు ప్రభుత్వం కట్టుబడి ఉందని ఎమ్మెల్యే స్పష్టం చేశారు. క్రీడా స్ఫూర్తితో యువత ముందుకు సాగి నియోజకవర్గానికి, రాష్ట్రానికి మంచి పేరు తీసుకురావాలని ఆమె పిలుపునిచ్చారు. భవిష్యత్తులో యువత కోసం మరిన్ని క్రీడా వేదికలు ఏర్పాటు చేస్తామని హామీ ఇచ్చారు.
ఈ ప్రారంభోత్సవ కార్యక్రమంలో ఎన్డీయే కూటమి నాయకులు, క్రీడా నిర్వాహకులు, స్థానిక ప్రజాప్రతినిధులు, యువత, క్రీడాభిమానులు పెద్ద సంఖ్యలో పాల్గొని క్రీడాకారులను ఉత్సాహపరిచారు.