సామాన్యుడి వంటింటిపై పెరుగుతున్న ధరల భారం

మార్కెట్‌కు వెళ్లాలంటేనే జంకుతున్న ప్రజలు

ధరల నియంత్రణపై ప్రభుత్వాల నిర్లక్ష్యమంటూ విమర్శలు

పులివెందుల, సెప్టెంబర్‌ 6 (జనస్వరం) : నిత్యావసర వస్తువుల ధరలు రోజురోజుకూ పెరుగుతుండటంతో సామాన్యుడి జీవనం భారంగా మారుతోంది. ఒకవైపు కుటుంబాల ఆదాయాలు అంతంత మాత్రంగానే ఉండగా, మరోవైపు నిత్యావసరాల ధరలు మాత్రం అదుపు లేకుండా పెరుగుతున్నాయన్న ఆందోళన వ్యక్తమవుతోంది. గత ఏడాదితో పోలిస్తే ఈ ఏడాది అనేక వస్తువుల ధరలు గణనీయంగా పెరగడంతో నెలవారీ కుటుంబ బడ్జెట్‌ను సమతూకం చేసుకోవడం సామాన్య, మధ్యతరగతి కుటుంబాలకు కత్తిమీద సాములా మారింది. ప్రస్తుతం కూరగాయల మార్కెట్‌ పరిస్థితి మరింత ఆందోళన కలిగిస్తోంది. కొనబోతే కొరివి.. అమ్మబోతే అడవి అన్న చందంగా మారిన ధరలు వినియోగదారులను బెంబేలెత్తిస్తున్నాయి. మార్కెట్‌కు రూ.100 తీసుకెళ్లినా ఒక పూటకు సరిపడా కూరగాయలు కూడా కొనలేని పరిస్థితి ఏర్పడిందని పలువురు ప్రజలు వాపోతున్నారు. ఒకసారి ఏదైనా వస్తువు ధర పెరిగితే తిరిగి తగ్గడం అరుదుగా మారుతోందన్న అభిప్రాయం వ్యక్తమవుతోంది. దీంతో పెరుగుతున్న ధరల భారం నేరుగా సామాన్యుడి వంటింటిపై పడుతోంది. నిన్నటి వరకు సాధారణంగా కొనుగోలు చేసిన కూరగాయలు, నిత్యావసర వస్తువులను ఇప్పుడు ధర చూసి కొనాల్సిన పరిస్థితి ఏర్పడిందని ప్రజలు చెబుతున్నారు.

వర్షాభావంతో కూరగాయల సాగుకు దెబ్బ

వాతావరణ పరిస్థితుల్లో వచ్చిన మార్పులు, వర్షాభావ పరిస్థితులు కూడా కూరగాయల సాగుపై ప్రభావం చూపుతున్నాయి. అనేక ప్రాంతాల్లో నీటి సమస్య తలెత్తడంతో కూరగాయల సాగు విస్తీర్ణం తగ్గుతోంది. సాగునీటి వసతి ఉన్న ప్రాంతాల్లో కూడా రైతులు పంట సాగు చేయాలంటే భారీ పెట్టుబడులు పెట్టాల్సి వస్తోంది. విత్తనాలు, ఎరువులు, పురుగుమందులు, కూలీల ఖర్చులు, నీటి వ్యయం పెరగడంతో రైతుకు సాగు భారంగా మారుతోంది. అయితే పంట చేతికొచ్చే సమయానికి రైతుకు గిట్టుబాటు ధర లభించక నష్టపోవాల్సి వస్తోంది. మరోవైపు ఉత్పత్తి తగ్గిన సమయంలో మార్కెట్‌లో ధరలు ఒక్కసారిగా పెరిగి వినియోగదారులపై భారం పడుతోంది. పంట ఉన్నప్పుడు ధర ఉండదు.. ధర ఉన్నప్పుడు పంట ఉండదు అన్న నానుడి కూరగాయల రైతుల పరిస్థితికి అద్దం పడుతోందని రైతు వర్గాలు చెబుతున్నాయి.

మధ్యలో దళారీల దందా.. వినియోగదారుడిపైనే భారం!

రైతు పొలం నుంచి వినియోగదారుడి చేతికి చేరేలోపు కూరగాయల ధరలు పలుమార్లు పెరుగుతున్నాయన్న ఆరోపణలు వినిపిస్తున్నాయి. రవాణా, నిల్వ, మార్కెట్‌ నిర్వహణ ఖర్చులతో పాటు మధ్యవర్తుల పాత్ర కూడా ధరల పెరుగుదలకు కారణమవుతోందన్న అభిప్రాయాలు వ్యక్తమవుతున్నాయి. రైతుకు లభించే ధరకు, మార్కెట్‌లో వినియోగదారుడు చెల్లించే ధరకు మధ్య భారీ వ్యత్యాసం ఉండటం సమస్యను మరింత తీవ్రతరం చేస్తోంది. రైతుకు సరైన ధర దక్కకపోవడం, వినియోగదారుడు అధిక ధర చెల్లించాల్సి రావడం మధ్యవర్తుల వ్యవస్థపై ప్రశ్నలు లేవనెత్తుతోంది.

ఉల్లి ధర గుర్తు చేస్తున్న గతం

గతంలో ఉల్లి ధరలు ఆకాశాన్నంటిన సందర్భాలు దేశవ్యాప్తంగా తీవ్ర రాజకీయ ప్రకంపనలు సృష్టించాయి. ఉల్లి ధరల పెరుగుదల ప్రభుత్వాలనే కుదిపేసిన సందర్భాలు చరిత్రలో ఉన్నాయి. నిత్యావసర వస్తువుల ధరల పెరుగుదల సామాన్యుడి జీవితంపై మాత్రమే కాకుండా రాజకీయంగా కూడా ఎంతటి ప్రభావాన్ని చూపగలదో అప్పటి పరిణామాలు స్పష్టం చేశాయి. అయితే ప్రస్తుతం కూరగాయలు, ఇతర నిత్యావసర వస్తువుల ధరల పెరుగుదలపై ప్రజల్లో మళ్లీ ఆందోళన పెరుగుతోంది. మార్కెట్‌కు వెళ్లి ధరలు అడగడమే భారంగా మారిందని పలువురు వినియోగదారులు చెబుతున్నారు.

రైతుకు గిట్టుబాటు.. వినియోగదారుడికి సరసమైన ధర కావాలి

ఇప్పటికైనా కేంద్ర, రాష్ట్ర ప్రభుత్వాలు ధరల నియంత్రణపై ప్రత్యేక దృష్టి సారించాల్సిన అవసరం ఉందని ప్రజలు కోరుతున్నారు. రైతుకు గిట్టుబాటు ధర లభించేలా చూడటంతో పాటు వినియోగదారుడికి కూడా సరసమైన ధరలకు కూరగాయలు, నిత్యావసర వస్తువులు అందేలా పటిష్టమైన మార్కెట్‌ వ్యవస్థను ఏర్పాటు చేయాలని డిమాండ్‌ చేస్తున్నారు. రైతు నుంచి వినియోగదారుడి వరకు సరఫరా వ్యవస్థలో ఉన్న లోపాలను సరిదిద్ది, అనవసర మధ్యవర్తిత్వాన్ని తగ్గించేందుకు చర్యలు తీసుకోవాలని కోరుతున్నారు. ధరల నియంత్రణకు చర్యలు తీసుకుంటున్నామని ప్రకటనలకే పరిమితం కాకుండా, ఆచరణలో ఫలితాలు కనిపించేలా ప్రభుత్వం చర్యలు చేపట్టాలని సామాన్యులు విజ్ఞప్తి చేస్తున్నారు. ధరల మంట ఇలాగే కొనసాగితే వంటింటి పొయ్యి వెలిగించడం కూడా సామాన్యుడికి భారమయ్యే ప్రమాదం ఉందని ప్రజలు ఆందోళన వ్యక్తం చేస్తున్నారు. ఇప్పటికే నెలవారీ బడ్జెట్‌లు తారుమారవుతుండగా, పెరుగుతున్న నిత్యావసరాల ధరలకు అడ్డుకట్ట వేయకపోతే సామాన్యుడి జీవనం మరింత సంక్లిష్టంగా మారే అవకాశం ఉందని అభిప్రాయపడుతున్నారు.