భోగాపురం, అక్టోబర్ 29, (జనస్వరం): మోంథా తుఫాను ప్రభావంతో భోగాపురం మండలం గుడివాడ గ్రామంలో గోస్తానీ నదిలో ఉధృత ప్రవాహం ఏర్పడింది. గట్టు తెగిపోవడంతో వరద నీరు గ్రామ రహదారులపైకి వచ్చి ప్రజల రాకపోకలకు తీవ్ర అంతరాయం కలిగించింది. ఈ పరిస్థితిని స్వయంగా పరిశీలించేందుకు నెల్లిమర్ల నియోజకవర్గ ఎమ్మెల్యే లోకం నాగ మాధవి సంఘటనా స్థలానికి చేరుకున్నారు. ఆమె స్థానిక ప్రజలతో మాట్లాడి, వారికి ఎదురవుతున్న సమస్యలను ప్రత్యక్షంగా తెలుసుకున్నారు. అధికారులు, ఇంజనీరింగ్ శాఖలతో సమన్వయం చేసి తక్షణ చర్యలు తీసుకోవాలని ఆమె ఆదేశించారు. గట్టు మరమ్మతులు, రహదారుల పునరుద్ధరణ పనులు వేగంగా పూర్తి చేసి, ప్రజల భద్రతకు ప్రాధాన్యత ఇవ్వాలని సూచించారు. ప్రజలతో మమేకమై వారి ఆందోళనలను అర్థం చేసుకున్న లోకం నాగ మాధవి తుఫాను వల్ల కలిగిన ఇబ్బందులను పరిష్కరించడంలో తన నిబద్ధతను చూపించారు. ఆమె స్పందన మరియు తక్షణ చర్యలు స్థానిక ప్రజల్లో విశ్వాసాన్ని కలిగించాయి.