నాయకత్వం అంటే బాధ్యత.
భయం, స్వార్థం, క్రూరత్వం మృగ లక్షణం
నాయకత్వం అనేది కేవలం అధికారం స్వీకరించడం లేదా హోదాను కాపాడుకోవడం కాదు.. అది ఒక గొప్ప బాధ్యత. నిజమైన నాయకుడు తనను నమ్మి వెనుక నిలిచిన ప్రజల శ్రేయస్సు కోసం రాత్రింబవళ్లు శ్రమిస్తాడు. స్వార్థం, ద్వేషం, క్రూరత్వం మృగాల లక్షణాలు; ప్రజా నాయకుడికి అవి తగవు. నాయకత్వం అనేది రక్షణ, మార్గదర్శనం, సమస్యల పరిష్కారం.. కానీ సాటి మనిషి మరణాన్ని కోరుకోవడం మాత్రం రాక్షస స్వభావం.
అడవిలో క్రూర మృగం ఆకలిని తీర్చుకోవడానికి వేటాడుతుంది. ఆ వేటలో తార్కికత ఉండదు; అక్కడ స్వార్థమే ప్రధాన ధోరణి. కానీ మానవ సమాజంలో అలా వ్యవహరించే వాడు నాయకుడు కాదు.. విషం కలిపిన మద్యం పంచే మృగంలాంటి వాడు. కోట్ల సంపాదించినా, కంచుకోటలు కట్టుకున్నా, ప్రజల మనసుల్లో మానవత్వం కోల్పోతే, చరిత్రలో పేరు మిగిలేది అపకీర్తే.
ఇతరుల మరణాన్ని ఆశించడం, ప్రతీకారం తీర్చుకోవడానికి ప్రజాస్వామ్య పద్ధతులను దుర్వినియోగం చేయడం నాయకత్వం కాదు.. అది మృగత్వపు ఆక్రోశం మాత్రమే. ఆ విధమైన క్రూరత్వం చివరికి ప్రజల అసహ్యానికి గురవుతుంది. ప్రస్తుతం పులివెందులలో చోటుచేసుకున్న పరిణామాలు ఈ విషయాన్ని స్పష్టంగా రుజువు చేస్తున్నాయి.
కంచుకోట కూలిపోతే — స్వయంకృతాపరాధమే :
రాజకీయాల్లో “కంచుకోట” అంటే ఒక ప్రాంతాన్ని, ఒక నియోజకవర్గాన్ని ఏకపక్ష ఆధిపత్యంలోకి తెచ్చుకోవడం. ఆ ప్రాంతంలో ప్రత్యర్థి పార్టీకి చాన్స్ లేకుండా చేయడం. ఆంధ్రప్రదేశ్ రాజకీయ చరిత్రలో పులివెందుల ఈ నిర్వచనానికి నిదర్శనం. వైఎస్ రాజశేఖర్ రెడ్డి 1978లో తొలిసారి పులివెందుల నుంచి పోటీ చేసి గెలిచినప్పటి నుండి, ఆ సీటు ఆయన కుటుంబానికి కట్టబెట్టినట్టు మారిపోయింది. కడప జిల్లా మొత్తం దాదాపు నాలుగు దశాబ్దాలు ఆ కుటుంబ ఆధిపత్యంలో నడిచింది.
అయితే 2024 ఎన్నికల్లో ఆ చిత్రమే మారిపోయింది. వైయస్సార్ కాంగ్రెస్ పార్టీ కేవలం మూడు సీట్లకే పరిమితమైంది. ఇప్పుడు జడ్పీటీసీ ఉప ఎన్నికల్లో కూడా పరిస్థితి అదే దిశగా సాగింది. ఇది యాదృచ్ఛికం కాదు.. జగన్మోహన్ రెడ్డి రాజకీయ వైఖరి, తప్పిదాల ఫలితం.
ఓటమి నుంచి నేర్చుకోవడమే నిజమైన నాయకత్వం :
రాజకీయాల్లో గెలుపు, ఓటమి సహజం. కానీ ఓటమిని ఎదుర్కొన్న తర్వాత దానినుంచి పాఠాలు నేర్చుకొని ముందుకు సాగడమే స్థితప్రజ్ఞత. ఈ లక్షణం నారా చంద్రబాబులో స్పష్టంగా కనిపిస్తుంది. 2004, 2009లో పరాజయాలు, స్థానిక సంస్థల ఎన్నికల్లో ఎదురైన దెబ్బలు, 2019లో ఘోర ఓటమి.. ఇవన్నీ ఎదురైనా ఆయన స్థైర్యం కోల్పోలేదు. 2024లో మళ్లీ అధికారంలోకి రావడం ఆయన సహనం, వ్యూహాత్మకత, చతురతకు నిదర్శనం. జగన్మోహన్ రెడ్డి అయితే ప్రతి ఓటమి తర్వాత ప్రతీకారం, కక్షతీర్చుకోవడం, భయపెట్టే రాజకీయాలకే పరిమితమయ్యారు. ఇది నాయకత్వం కాదు — ఆత్మవినాశక వైఖరి.
________________________________________
పులివెందుల జడ్పీటీసీ ఫలితం.. 30 ఏళ్ల చరిత్రను తారుమారు చేసిన తీర్పు :
పులివెందుల జడ్పీటీసీ ఉప ఎన్నికలో టీడీపీ అభ్యర్థి మారెడ్డి లతారెడ్డి 6,052 ఓట్ల తేడాతో సంచలన విజయం సాధించడం రాజకీయ భూకంపం లాంటిది. 30 ఏళ్ల తర్వాత ఈ స్థానాన్ని వైసీపీ కంచుకోట నుండి గెలుచుకోవడం, అంతేకాదు ప్రత్యర్థి డిపాజిట్ కూడా గల్లంతు కావడం, ఆ పార్టీకి ఘోర అవమానం. ఇది కేవలం ఓ ఎన్నిక ఫలితం కాదు.. వైఎస్ జగన్ రెడ్డి పునాదులు కదులుతున్న సంకేతం. గతంలో కుప్పంలో చంద్రబాబుకు ఎదురైన పరిస్థితిని ఇప్పుడు పులివెందులలో జగన్ ఎదుర్కొన్నారు. తేడా ఏంటంటే.. చంద్రబాబు ఆ దెబ్బను తట్టుకుని మళ్లీ నిలబడ్డారు; జగన్ చేయగలరా అన్నది సందేహం.
కూటమి వ్యూహం — పులివెందులపై ప్రతీకారం :
2022లో పులివెందుల జడ్పీటీసీ సభ్యుడు రోడ్డు ప్రమాదంలో మృతి చెందారు. అప్పట్లో వైసీపీ ప్రభుత్వం ఉన్నప్పుడు ఉప ఎన్నిక జరిపి ఉంటే ఏకగ్రీవం అయ్యేది. కానీ వాయిదా వేసారు. ఇప్పుడు కూటమి ప్రభుత్వం ఈ ఎన్నికలను నిర్వహించింది.
ఉద్దేశ్యం స్పష్టమే.. పులివెందుల, ఒంటిమిట్టలో వైసీపీని ఓడించి, జగన్ బలం పెరిగిందనే ప్రచారాన్ని పూర్తిగా తిప్పికొట్టడం. ఈ వ్యూహం ఫలించింది.
వైసీపీ బహిష్కరణ — ఓటమి భయానికి నిదర్శనం :
ఎన్నికల ప్రక్రియలో ఏ దశలోనైనా బహిష్కరణకు పిలుపు ఇవ్వడం అంటే ప్రజాస్వామ్యాన్ని అవమానించడం. రెండు పోలింగ్ బూత్‌లలో రీ-పోలింగ్ జరిగితే బహిష్కరిస్తామని చెప్పి, చివరికి కౌంటింగ్‌ను కూడా బహిష్కరిస్తామని ప్రకటించడం వైసీపీ బలహీనతకు నిదర్శనం. ప్రజలు స్వేచ్ఛగా ఓట్లు వేసినప్పుడు దానిని దొంగ ఓట్లు అంటూ, పోలింగ్ బూత్‌ల వద్ద ఉన్న స్వంత ఏజెంట్లను కూడా నమ్మకపోవడం, రాజకీయ పరాజయాన్ని అంగీకరించలేకపోవడం.. ఇవి భవిష్యత్తులో వైసీపీని మరింత క్షీణత వైపు నడిపే సూచనలు.
పులివెందుల తీర్పు ఏపీ రాజకీయ భవిష్యత్తుకు సంకేతం :
ఈ ఉప ఎన్నిక ఫలితాలు ఒక నియోజకవర్గం పరిధిలో మాత్రమే ఉన్నప్పటికీ, వాటి ప్రభావం రాష్ట్రవ్యాప్తంగా ఉంటుంది. పులివెందులలో వైసీపీ డిపాజిట్ గల్లంతు కావడం, ఒంటిమిట్టలో వెనుకబాటు.. ఇవన్నీ జగన్ రాజకీయ భవిష్యత్తుపై ప్రతికూల ప్రభావం చూపిస్తాయి. ప్రజాస్వామ్యంలో విజయాలు, పరాజయాలు సహజం. కానీ నాయకుడు ప్రజల తీర్పును గౌరవించి, దానినుంచి నేర్చుకొని ముందుకు సాగాలి. అది చేయలేని వాడు నాయకుడు కాదు — మృగత్వపు ఆక్రోశానికి లోనైన వ్యక్తి మాత్రమే. పులివెందుల తీర్పు ఒక గట్టి సంకేతం.. ప్రజలు ఇక భయపెట్టే రాజకీయాలకు, అహంకారానికి, స్వార్థానికి తావు ఇవ్వబోరని స్పష్టమైన సందేశం పంపారు. ఇప్పుడు ఆ సందేశం అర్థం చేసుకున్నవారే భవిష్యత్తులో నిలబడగలరు.