పిఠాపురం, అక్టోబర్ 2, (జనస్వరం) : పిఠాపురం నియోజకవర్గంలోని విరవాడ గ్రామం–పిఠాపురం పట్టణానికి మధ్యలో ఉన్న గంగానగరం గ్రామ ప్రాంతం సుమారు 60 సంవత్సరాలుగా ఏ గ్రామ పంచాయతీ పరిధిలోకి వస్తుందో తెలియని పరిస్థితిలో కొనసాగుతుండటంతో, అక్కడ నివసిస్తున్న ప్రజలు అనేక సమస్యలతో ఇబ్బందులు ఎదుర్కొంటున్నారని గ్రామస్తులు ఆవేదన వ్యక్తం చేశారు. ఈ సమస్యను రాష్ట్ర ఉపముఖ్యమంత్రి, పిఠాపురం ఎమ్మెల్యే కొణిదెల పవన్ కళ్యాణ్ దృష్టికి తీసుకెళ్లాలని స్థానిక శెట్టిబలిజ సోదరులు కోరారు. ఈ విషయాన్ని ఆంధ్రప్రదేశ్ రాష్ట్ర శెట్టిబలిజ కార్పొరేషన్ డైరెక్టర్ పెంకే జగదీష్ దృష్టికి తీసుకెళ్లగా, ఆయన జనసేన పార్టీ జిల్లా అధ్యక్షుడు, డిసిసి బ్యాంక్ చైర్మన్ **తుమ్మల రామస్వామి (బాబు)**తో పాటు కాకినాడ పార్లమెంటు సభ్యుడు తంగళ్ళ ఉదయ శ్రీనివాస్ దృష్టికి ఈ సమస్యను చేరవేశారు. గంగానగరం గ్రామ సమస్య పరిష్కారానికి చర్యలు తీసుకుంటామని తెలియజేస్తూ, జనసేన పార్టీ జిల్లా అధ్యక్షుడు తుమ్మల రామస్వామి స్వయంగా గంగానగరం గ్రామాన్ని సందర్శించి, అక్కడ నివసిస్తున్న శెట్టిబలిజ సోదరుల సమస్యలను ప్రత్యక్షంగా తెలుసుకున్నారు. ఈ సమస్యను త్వరితగతిన పరిష్కరిస్తామని గ్రామస్తులకు హామీ ఇచ్చారు. ఈ కార్యక్రమంలో పిఠాపురం మార్కెట్ యార్డ్ చైర్మన్ వాకాపల్లి దేవి సూర్యప్రకాష్, ఏలేరు ప్రాజెక్టు వైస్ చైర్మన్ వూట నాని బాబు, విరవాడ గ్రామ కమిటీ ప్రెసిడెంట్ కురాకులు వీరబాబు, రామిశెట్టి సూరిబాబు, మైనం స్వామి, జనసేన నాయకులు, జనసైనికులు తదితరులు పాల్గొన్నారు.