హైదరాబాద్, జూలై 25 (జనస్వరం): నీట్ ప్రశ్నపత్రం లీకేజీ ఘటనను నిరసిస్తూ జేపీసీ పిలుపు మేరకు శుక్రవారం విద్యాసంస్థల బంద్ నిర్వహించారు. ఇందులో భాగంగా తెలంగాణలోని జూబ్లీహిల్స్ నియోజకవర్గ పరిధిలో శ్రీకృష్ణ నగర్ డివిజన్ అధ్యక్షుడు ఫిరోజ్ ఖాన్, సుమన్ ఠాకూర్ ఆధ్వర్యంలో కాంగ్రెస్ నాయకులు భారీ ధర్నా నిర్వహించి కేంద్ర విద్యాశాఖ మంత్రి ధర్మేంద్ర ప్రధాన్ దిష్టిబొమ్మను దహనం చేశారు. ఈ సందర్భంగా నాయకులు మాట్లాడుతూ, నీట్ ప్రశ్నపత్రం లీకేజీతో లక్షలాది మంది విద్యార్థుల భవిష్యత్తు ప్రశ్నార్థకంగా మారిందని ఆవేదన వ్యక్తం చేశారు. ఈ ఘటనకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ వెంటనే రాజీనామా చేయాలని డిమాండ్ చేశారు. ప్రశ్నపత్రాల లీకేజీలను అరికట్టడంలో కేంద్ర ప్రభుత్వం పూర్తిగా విఫలమైందని విమర్శించారు. విద్యార్థుల భవిష్యత్తుతో చెలగాటమాడుతున్న ప్రభుత్వ వైఖరిని ప్రజలు గమనిస్తున్నారని పేర్కొన్నారు. దేశంలో పారదర్శకమైన పరీక్షల వ్యవస్థను ఏర్పాటు చేసి విద్యార్థులకు న్యాయం చేయాలని కేంద్ర ప్రభుత్వాన్ని కోరారు. ఈ కార్యక్రమంలో కాంగ్రెస్ పార్టీ నాయకులు, కార్యకర్తలు పెద్ద సంఖ్యలో పాల్గొని కేంద్ర ప్రభుత్వ తీరును తీవ్రంగా ఖండించారు.